打印

3/4 純陽南脊 + 馬騮崖

藍熊

新手上路

Rank: 1

1^# 大中小發表於 2007-4-3 11:27 PM 只看該作者

3/4 純陽南脊 + 馬騮崖

趁住今日放假同euld再加另一位朋友三支公齊齊探訪八仙嶺, 當然我地上上落落多數唔搵正路, 專揀有警告牌棟向度既騎呢路玩. 今日雖然路面濕滑, 不過照樣出發由純陽南脊上八仙嶺過仙姑峰, 今日大概九點半左右入到山寮, 沿山寮路行幾分鐘到見到警告牌就係今日既起點 - 純陽南脊.

起初見到個入口直到無倫真係有少少嚇親, 但行一陣後坡度冇咁厲害, 沿途正如香港行山網既朋友講頗多浮沙碎石, 再加上路面濕滑的確幾跣, 行走時步步為營唔敢太急(雖然我果時趕時間), 沿途都有絲帶引路唔會走錯, 條路下段及中段大概三四十度斜, 但有少數大石位間中要手足並用, 最吃力係上段, 條路去到五六十度斜, 行冇幾步就撻皮, 我就向果時比灌木割損手, 我朋友就比石頭擦傷菠蘿蓋, 到純陽峰後小休一會後再慢慢行到仙姑峰, 依家行八仙嶺對我地講真係食菜咁食, 不消半小時即到仙姑峰, 去到仙姑峰仲撞到另一班行山隊, 同佢地傾一陣閒計就各散東西.

之後沿警告牌後面山路落馬騮崖, 由於馬騮崖我之前行過兩次, 其中一次仲要單挑, 所以今次落山覺得冇乜大不了, 再加上另外兩人又係資深人士, 所以全程好順利, 入林果時我仲無情情食到蜘蛛絲, 仲有人問我d蜘蛛絲有冇味, 認真爆笑, 之後好快出番自然教育徑第三站再行番出去大尾篤搭車散水. 今次行程大概用左兩小時, 唔算太耐, 本來想行遠d架, 但因為我要出上環搵明星, 所以最後一齊走人.

純陽南脊果度d警告牌認真奇怪, 山寮路果個寫住「前面的山徑艱險難行, 隱敝或季節性雜草叢生, 為閣下安全著想, 請勿前進」但純陽峰上面就「此段路艱險難行只宜有經驗及裝備良好的人士前往天氣惡劣時切勿嘗試請加倍小心」不過無論如何棟得警告牌都知係牙煙路, 一律照玩. 呢d警告牌字句我真係背晒出黎都得